المَطره

فيصل

فيصل خليفة :

للتواصل مع صفحة الكاتب على الفيسبوك الرجاء إضغط هنا

هَبّت..
والسَماء إنزردت تَعبّت
اُمى تبّت
دخّلت باقى المراتِب
شويتين والمَطره صَبّت
كُل سَباليق البيوت فى الحِلّه كبّت
الكهارب فجأه خبّت
صِحيَت أمباتنا القديمه
نارها شبّت…

عم محمد يا الطماطِم
الخَدار يادوب براعِم
عَبّ بطاريتو فازِع
والسحاب بى باقى نَضمو
طِين محل مالاقىَ شارِع
طابق المركوب فى باطو
وايدو نورو وايد عَصاتو
الطجارب يا الطجارب
الخدار غرقان وشارِب
كف فى كف بى ايدو ضارِب
موسمو ميّت
يبقى موسمو الجاى كارِب
الله غالب…

حاجّه عشه اجُر وعافيه
قالوا اُمبارح وقعتى
خير سلامتك جات خفيفة
تسلم آيابا اليعافيك
قُمت لم المطره وِقفت
قُت اشوف غنمايتى صِبحت
الحويش واطاتو شِينه
ماهو رمله تُرابتو طِينه
غايتو كان ما الله شاف لى
كُت كسر بالميّت إيدى
إلا قدّر جات سليمة
والغنيمايه الغشيمه
حبّه ما حصلت عليها
اصبحت مَرقت رعيها…

التِرلات الكوّارو
حايمه فينا تجى وتفوت
نقنقة مطر الخريف
قددت راس البيوت
الجراكين والجرادل
حبل طالع وحبل نازِل
الجُهال مرقوا الشوارع
يبنوا من الرمله جامِع
الزرايب للبهايم
الحُجار فى شكل ضان
ياتو فينا بهايمو اكتر
وياتو مِرحاتو السُمان…

لورى حامد برّه ينبح
واقف لَساتكو موحِلات
شاحن لى شوّالات فَحم
والحِله كُلها برّه جات
لِزّك تلِز لِزّك تلِز والناس تنِز
الحِيلو فى والحيلو مات
والجَهله مجااانى الفِلم
كان بى مُرادهم مايتم
اللورى ينبح للصباح
وحامِد يخيّب ظنهم
اللورى ينفك واستراح
سوّاق هو صاح
وسواقتو مى سُواقة نُصاح
لفّ البلودات والبِطاح
لا يوم ضِهب لا مرّه راح…

المَطره جات المطره جات
قِبليه مِن تال الشرق
بيت القفير اللى وراء
إتعبّى بالمُويه وغِرق
شان بيتو طِين
على دا الوضع واقف سِنين
مرّن عليهو كمّين خريف
البيت مؤكد مابيقيف
وعم القفير ما مِن هنا
جايينا ضِيف
ادوهو بيت
شغّال وحارس المَدرسه
بمشى وبِبيت
شال ليهو عصا
فَرده ولِحاف
راديهو والليل مابيخاف
صِبحت غِشىَ الجَزُر القريب
بصلات طماطم وكوم لحم
فى بيتو زيتو وفى الفحم
شال الرغيف
طيّب خفيف
ظبّط مُلاحو وكَب فطر
راديهو شغال بالحَجر
خت راسو نعسان من سَهر
خت راسو فى بالو المطر
اتلملمت فوقو السماء
قُبّال تمغرب ضلمت
والشُوف عَمىَ
تِحتو المحطّات شوّشت
والرادى شَخره وهمهمه
تِقل السحاب
إنقد فى راسو وهَمىَ
الحِله مافضّل نفر
الأعمى شايل الإنكسر
شالوهو فردتو واللِحاف
وعصاتو راديهو الحَجر
شالوهو مارقين مِن سُكات
عم القفير بالمُويه مات…

يا مِطيره صُبّى لينا فى عينينا
يا مِطيره ذكرينا لو نِسينا
يا مِطيره نحن لسه علمينا
يعنى إيه يا مطره طُوبه
يعنى إيه يا مطره طِينه

يا مطيرة يا مطيرة!

 

عن فيصل خليفة

mm
شاعر من السودان

أضف تعليقاً