الرئيسية / العدد العشرون / وردى غنّى ياخ..

وردى غنّى ياخ..

10425403_958232810872048_3122578673017631408_n

فيصل خليفة :

للتواصل مع صفحة الكاتب على الفيسبوك الرجاء إضغط هنا

**

قفِّل وراء
فاضيات وراكم مقعدين
قفّل عشان تركب مَره
الحافله يا بيت الغلابه المُتعبين
الحافله حين لا مقدره
كُل التعابه الراجلين
فى الشمس لاضُل لاضرا
قفِّل وراء..

قفِّل وراء ومِد ليك جنيه
مِد دون زعل
عارف وقوفنا كتير شديد
بس حانصل
او مانصل
عندك حلل؟
قفِّل وراء..

قفّل ولوك صبر الطريق
قفّل ولاتزهج تضيق
بنقيف مع مَدة اصابع ناعمات
بنقيف محل مالاح من الشارع بريق
بنشيلها توصل جامعتها
والخاله بى كامل قُفافها وعِدتها
راجل كبير..شافع شليق
قفِّل وراء..

طق طق جِنيه
طق كم نفر
طق طق تمام
العَشره وين!
طق طق ارح
امرُقنا..زين
الغُنيه كاربه
الصُوت حنين
قفِّل وراء..

بتجينا زى اوسم ملاك
بتجينا للكوم الهِنا
الكوم الهِناك
ضاجّه الاشارات بالعيون
كُل الشوارع ارتباك
انسربى نندس فى ضراك
يا مُبهجه
ياقاسى آخر اليوم لِماك
الزحمه والنار والهلاك
قفِّل وراء وتُر للمعاك
قفِّل وراء..

اقابلِك فى زمن ماشى وزمن جاى وزمن لسه
اشوف الماضى فيك باكر
اريت باكر يكون هسه
غنّى ياخ ياوردى غنّى
خفف الوجع المكنّى
زى تكنّى غريب علّىَ
زى تكنّى غريب تكّنى
هسه فى شُبّاك وسارح
حافله بتضج بالمسارح
والتهاويم والتمنّى
كُلو غايب جُوّ كلو
كُلو هسه معاك بغنى
اقابلك فى زمن ماشى وزمن جاى وزمن لسه
اشوف الماضى فيك باكر
اريت باكر يكون هسه
قفِّل وراء..!!

عن فيصل خليفة

mm
شاعر من السودان

أضف تعليقاً