الرئيسية / العدد الواحد والعشرون / عرض مزيد من الإحساس

عرض مزيد من الإحساس

Computer Logos Reflected in Eyeball - Apr 2009

نَص مُشترك : * عُمر مصطفى (ابو مِنه) * عزام عبد العاطى *  نُهى الكبّاشى (ضُل المطر)

*فيصل خليفة :

للتواصل مع صفحة الكاتب على الفيسبوك الرجاء إضغط هنا

__

فيصل..

عرض مزيد من الإحساس

اذا انتابك شعور بالظُلم

ولاقدّر اصابك باس

النام زين شرح نومو

والمستوطنو اب كبّاس

نشر الحاله فى العامّه

بتوريك مزاج الناس…

نُهى..

بكوسبها  لي عيون  بتشوف

ولي قلباً يكون بي حاس

وبهبش بيها وتراً حىّ

وبشكي  ان كُتّ مقطوع راس

بشوف الزيى ممكون تب

برُد  وان كُتّ ما  ونّاس

بجيب خبر البشوفو كتب

وعرض مزيد من اﻻحساس…

عزام..

عرض مزيد من الاحساس

مساحة مستطيل تنقاس

علي حسب المعاك في الهم

علي حسب الببادلك بوح

مقاسمة الفرح والغم

مطايبة القريب للروح

كأن يبقي القريب بالدم

اذا حسيت سريرك دوح

وحسيت بيك من فرط المحبة دباس

فقوقي وبوح

وسوي غناك في جدي المها المياس

مشاركة للصحاب عندك

عشان عدوي المحبة تعم

كعرض مزيد من الاحساس…

ابو مِنّه..

هو من ناحيه :

كعرض مزيد من الايضاح

وتعرية لي مخافي الروح ..

ومن ناحية جمال تانية:

كترسيخا لمبدأ هام” أن الاصحاب جسد واحد

اذا اشتكى في البدن

عضوٌ

تداعى سائر الاصحاب بالسهر الشديد والنوح”..

وفرحك ياخي شن طعمو

بلا الاصحاب يجو  يتمو

وحزنك لو ح تسكت بيهو  ببقى جروح

ف أحسن من تموت بي، تبوح ..

و زي ما قال قبيل فيصل

نشر الحالة في العامة

بتوريك مزاج الناس

كعرض مزيد من الاحساس…

فيصل..

وطبل (الحُب) ضرب

يا هِنايه (لايكى) خلاس

وصورة بِت بتضوى حنين

ويمرقو ناس ويدخلو ناس

وفيديو غريب مشاركو حبيب

وبوست الشكله والجِقليب

وقِصّه تضج سماحه وطيب

وزول علّق ولايك داس

وصورة نانسى حصدت كم

ولا تخرُج ايا مُسلِم!

والمحتاج قروش عمليه

والبتهاتى دايره الدم

وكم من حاله كم من زول وكم من كم مشى اتقدم وونسة شات عديلو انتم

سماحة الناس..ركوب الراس

طيابه ولين..وشده وباس

و عرض مزيد من الإحساس…

نُهى..

عرض  مزيد من اﻻحساس

تجيبلك  زول  يقولك شن

وتحكيلو  المضايقك يوت

ومنو بتشكي دوم وتئن

قدر ما جاط جواك  الهم

بتتكلم  جواكا يصن

صِحاب  سندالة لي مِيلك

صِحاب عدالة  لي عوجك

وتجيك محبوبتك المقصودة بي حالتك

تعاين ليها تتكشم  وبيكا تجن

تجيك في الخاص تجاكرك وتاني  تغمز ليك وتحنس فيها بالريد ان بقت بتحن

تقول  ليك  جابتا  الحالة

وهى عارفة بلاها بطالة

سَعينا تملّي لي وصاﻻ

وما عرفنا الدرب كيفن

عرض مزيد من اﻻحساس

بناقر بيها  خياً لي

شان باقيلو  بير اسرار

بخليو لعبة بين ايدي

هو  خياً لي  جزم  وان  دار

بشيد  ليو بيوت  من  ضي

وبوهب  ليهو شوف  عيني

بس يومي  اﻻشوفو نشر

بتمّر بيو عجاج كُرعي

عرض مزيد  من اﻻحساس

بتابع  بيها زولي  براو

ولما  يشوفني تابعتو

بِمش  وابراو

وكل  ما  مرّ بي  الليل 

بقوم بطراو

بشوف  احساسو في الحالة

وبلاو الحالة  بطالة

وكل ما زاد على الشوق صبح  وسواس

بمش  لي فوق بعرض مزيد من اﻻحساس…

عزّام..

عرض مزيد من الاحساس

هو عرض مزيد من الاحداث

من النوع البدور جُواك

وعرض مزيد من الاشواق

وعرض مزيد من الاحزان

وعرض مزيد من ال .. تعرف ؟

هو بي كُل اختصار انك

بتعرض في المزيد مِنك

ويشاركوك الصحاب روحك

كأن تهطل سحابة حُزن

يدمّع جوة جُوفك مُزن

أذا كل المريدين أُذن

أو لحظة حنين او شوق

تبث عبر الأثير حِنك

يشاركك في الهموم غيرك

وبرضو تشاركو في جِنك

واذا كَترت من شِيرك

فكتّر الف يوم خيرك

ولايكاتك تعابيرك

تعاليقك تصاويرك

هو ما الفيس بوك دا زي بيتك

وحالتك ياها زيت زيتك

وكل الاصدقاء عندك

ضيوفك وانت زول ونّاس

ونسة وقرقراب وايناس

وفضفضة واندياح واشجان

وايصال فكرتك للناس

اكان فرحان اكان زعلان

دا عرض مزيد من الاحساس…

فيصل..

كِده الفِكره

عرض مزيد من الحاضر

وما قد يأتى بيهو بُكره

امزِجه ساعه ساعه تمام

وساعات ضيّقه و عَكِره

بوستات كيف تحسّها كيف

وبوستات عشره على عشره

كِده الفِكره

اربعه من شباب كَتّاب

اربعه سمحّين واصحاب

عشان خاطر عيون أحباب

تنادوا ودون مشقه وباس

تنادوا ووحدّو الأنفاس

لعرض مزيد من الإحساس!!

عن فيصل خليفة

mm
شاعر من السودان

لا تعليقات

  1. رائعين كما العادة

  2. رائعين كما العادة

  3. سمحين اتو ديل

  4. سمحين اتو ديل

أضف تعليقاً