نُهى..

6989hlmjo

فيصل خليفة :

للتواصل مع صفحة الكاتب على الفيسبوك الرجاء إضغط هنا

**

انا داير اقول فيك يا نُهى

وقُبال اقول…

عُذراً شديد

لو حرفى مابان ليك جديد

او غبّ فى حضرة عيونِك او سِهىَ

هادى العوينات بلخمن

واشفت حروف بتوّها

انا بجتهد حدّ الكلام

وشانك ازِينها و اجيّها

يا بِت نُهى!

ابداكى من وين هسه بس!

وانا قبل اكتب كلمتين

القلب اتستّف حنين

والراس كبس

كِلمه واقيف

يا الله من زنقة حروفك والجِرَس

قولى انشده لو تعرفى

وحِسّى إنحبس

وقعدت احنّس فى القصيد

شان يبدو فى عيونك جديد

بس العوينات بلخمن

وبفتّرن عزمى الاكيد

عذراً شديد

لو كنت فى واجبِك بليد

اصلاً كتابتك إمتحان

وانا جد جبّان

برجف قُصاد هذا الحنان

ويبدأ الغياب والجَهجهه

بى سراع يمُر نِصف العَجن

والقى الوقت فات وانتهى

يابِت نُهى!

شان انضُمِك فى بيت شِعر

شان انقلك فى شكل حرف

وجِلد الورق مايقشعِر

والدُنيا ماتنمِّل معاى

واللحظه تتهادى وتمُر

مفروض امامِك اتزِّن

وقدام عيونِك استقّر

بس قولى كيف

وعينيك اساساً بلخمن

عينيك ضمير المُستتر

حاضر وفالح فى الغِياب

عينيك سِحر

عينيك سَحر

مرقن طيورو مع الصباح

كل المدائن صح صحت

واتجارو فيها أطفال سُمر

ياروحى كُر

يابنيّه ها

يا بِت نُهى!

يا بنيّه ايدىّ تلّجن

انا سُحت حِن

ونزلت اوزّع بذرتك للطين

انا داير اشوفِك فينا كُلنا

مبسوطه فى اللُون والسِحَن

انتظرى بسقيك بتّقى

إنشّرى فينا حَياه ووطن

القاك نبرة من تغنّى وقال

ومن دوبا ورطن

القاكِ مبدأ ومُنتهى

 

يا بِت نُهى!

عن فيصل خليفة

mm
شاعر من السودان

أضف تعليقاً