كَدى القهوه

فيصل

فيصل خليفة :

للتواصل مع صفحة الكاتب على الفيسبوك الرجاء إضغط هنا

كَدِى القهوه وبِنتفاهم

باكِر اذا الكريم هَوّن

بقنع ليكِ ها العالم

(بجيكم بدرى قبل الشُوق)

وبطلُب من ابوك إيدِك

بورّيهو بى بساطه شديد

انى بحبِك وبريدك

ومابسألنى عندك كم

حايتفهّم

ويقول لى تَم

وينادوك مابتقولى بِغم

تعاينى على ونِتكشّم

متجّمه من رهافةً فيك

وانا متجّم…

كَدِى القهوه وصباحها رباح

اكان ماجيتكم آبرتاح

لاعربيه لا مُفتاح

بجيك كدّارى زى سوّاح

بدق باب بيتكم الازرق

جبينى ينز بقايا عَرق

قِليبى من العليهو يدُق

ويفتح لى شويفع ساى

وبى صوت وآطى ازيّك

ابوك قاعِد!

يقوم شارد

ابوى جاك ضيف

ونبضى يقيف

حبابك مرحب اتفضّل

واقوم ادخُل

مسرِّح وشاكّى مُتريِّح

ظريف وسمح

قعدت الحاصِل الاحوال

ههه كيف ياخال

وعُسر الحال ويُسر الحال

ويُسر الحال وعُسر الحال

تدخُلى علينا شايله الشاى

تختيهو وتقعدى حِداى

ابوى شاهيك بدون سُكر

تأشرّى لى شاهيك كيف!

وعارفه وفايت اشواقِك

بأن شاهينى دِيمه خفيف

تكبيهو وتسوطينى وتسوطيهو

تجيبى على تمديهو

قعدتى ومطبخِك فاير

بهمس اخواتِك الاتنين

بيدعن ليك وشفقانات

وطقم الشاى يسو آمين

يفيض قلبى المعبّىَ حنين

واقول يا خال

انا تقدر تقول شغال

ومرّات عادى ماشغال

بحب هذه البِنيّه شديد

معاى هسه تلاته جنيه

ورق و حديد

وشايل لىَ نوكيا قديم

وخالى رصيد

تقووول تقدر تقول عدمان

بلا القلب الملان إيمان

بأن باكر اكيد نديان

يزغرد مطبخِك فرحان…

كَدِى القهوه وبتتيسر

بجيك ماتصبح الواطه

نَدِي واخدر

بجيك شان نخطِب السُكر

بدق الباب وتفتحي لي

وتنسى ايديكِ فوق ايدى

مسافه وفجأه تنتبهى

وسَت تنسربي زي نسمه

وفي عينيك عقاب بسمه

واخُش ممهول

وزى ايّة خطيب مسئول

سلام ياخاله كيف ياحاج

لا مطلوب ولا مُحتاج

بجيك لا هامِّى لاقلقان

ولا خايف من الاحراج

وبرّه موقف التُوسان

ابوى مُرتاح شديد جداً

قروشو ولا بيتعدّن

وزاتكُم انتوا مُرتاحين

وسااااى سمحين

انتى معاك تلاته اخوان

ومافيشين

ليهم فتره مُغتربين

ابوك وأُمك وحبشيه

قعدنا الكِيك وطقم الشاى

وابوك ياولدى كيف بالله

تمام والله

وعارف انى سَلفاً جاى

قرينا عليك

وفُتَ عيونى فى عينيك…

كَدِى القهوه !!

عن فيصل خليفة

mm
شاعر من السودان

اترك تعليقاً