الرئيسية / احدث التدوينات / مَسرحنا الشارع المجانى..

مَسرحنا الشارع المجانى..

14458997_614399348740784_123731438_n

**

ومِراية الكُمسارى الفى الباب

ماانختت ياصاحب صوره

قد ماتبدو فى نظرك هامّه

ماعادى مِرايه ومكسوره

لكن ياصاحبى وياصاحبه

الناس الرِكبت والقعدت

والناس اليادوبهم راكبه

صاحِبنا مِرايتو مُهمه شديد

وبتخدم اغراض حيويه

مثلاً ما يطلع صُبح جديد

ويستبشر بى فرده قويه

الا ويلمح فى مرايتو الريد

وتأشِّر للحافله بِنيه

ومرّات راكب يتلايق بس

ومايدفع كامل التعريفه

صاحبنا بحمّر ليك بيها

ومرايتو متمّره ونضيفه

وبكشّف بيها اسرار سفه

ارتاحت فى اسفل شَفه

دِسيسه ومظبوط وظريفه

وبعيداً عن شرح الاغراض

وماتعنى مِراية الكُمسارى

مع كل ماتحملو من أبعاد

خلونا نركّز فى غيرها

استاذه بتركب بى صعوبه

فى رموشها انفجرت طبشيره

قعدت والشِبشِب بتنهّد

والراس مشغول فِكر وحيره

اتقاسم وجدانها الرادى

متوهِّج بى ايقاع سيره

راجيها خدار وتلاته صُغار

مابين الغُنيه البتنادى

وبين خوف إحساسها وتقصيرها

على ايه بتصفّق ياصاحِب

مابين مُتدلى وبين راكِب

امعن فى شوفك وحدثنى

بين حاج سبعينى وبين طالِب

مسرحنا الشارع المجانى

حافلتنا المليانه متاعِب

عن فيصل خليفة

mm
شاعر من السودان

أضف تعليقاً